Abaturage bo mu byiciro bitandukanye bo mu karere ka Gatsibo babyutse bagana ibigo nderabuzima n’ibitaro bya Kiziguro na Ngarama mu rwego rwo guhabwa doze ya 2 y’urukingo rwa AstraZenneca.
Icyo gikorwa cyakozwe kuri uyu wa gatandatu taliki ya 29 Gicurasi 2021 kuri site 20 zirimo ibigo nderabuzima 18 no ku bitaro bibiri bya Kiziguro na Ngarama byo mu karere ka Gatsibo.
Urukingo rwa Kabiri rwa AstraZenneca rwahawe abaturage bari mu byiciro bitandukanye birimo abikorera,abakuze n’abari mu nzego z’ubuyobozi bahura n’abantu benshi bashobora kugira ibyago byo kwandura icyorezo cya Covid 19.
Sebatware Clement,ni umwe mu bakingiwe urukingo rwa Kabiri kuri uyu wa gatandatu ku kigo nderabuzima cya Kabarore,yavuze ko amaze guhabwa inkingo ebyiri za AstraZennica nkuko amabwiriza ya Minisiteri y’ubuzima abivuga.
Ati’’nkuko byari bisanzwe, nzakomeza kubahiriza amabwiriza yo kwirinda icyorezo cya Covid19 kugeza ubwo hazaza andi mabwiriza yo gusubira mu buzima busanzwe’’.
Mukabaranga Antoinette w’imyaka 77 yahamije ko kuva yahabwa urukingo rwa Koronavirusi atigeze agira ingarauka mu mubiri we akaba yafashe n’urwa kabiri,Yavuze ko nk’umuntu ugeze mu zabukuru yakomeje kubahiriza amabwiriza yo kwirinda icyorezo cya koronavirusi kandi azakomeza kubikora kugeza inzego z’ubuzima zishyizeho andi mabwiriza.
Habiyaremye Jean Claude Umuyobozi w’ishami ry’ubuzima mu karere ka Gatsibo yavuze ko ku kiciro cya Kabiri cyo guhabwa urukingo rwa AstraZenneca,Mu karere ka Gatsibo hakiriwe inking ibihumbi 5,360 harimo 3,500 byoherejwe ku bitaro bya Kiziguro n’igihumbi 1,860 ku bitaro bya Ngarama.